සෝමවංශ අමරසිංහ මහතා නැවත පක්‍ෂයට එක් කර ගැනීම සදහා උපරිමයෙන් කටයුතු කරන බවත් එය සාර්ථක වනු ඇතැයි අපේක්‍ෂා කරන බවත් ජනතා විමුක්ති පෙරමුණේ දේශපාලන මණ්ඩලය නිකුත් කළ නිවේදනයේ වැඩිදුරටත් සදහන්. තමන් ජනතා විමුක්ති පෙරමුණෙන් ඉවත් වන බව සෝමවංශ අමරසිංහ මහතා මාධ්‍ය හමුවේ ප‍්‍රකාශ කළේ ඊයේ දිනයේදීයි.
කෙසේ වෙතත් සෝමවංශ අමරසිංහ මහතාගේ ඉවත් වීම සම්බන්ධයෙන් මෙතෙක් පක්‍ෂයට ලිපියක් ලැබී නොමැති බව ජනතා විමුක්ති පෙරමුණේ ප‍්‍රධාන ලේකම් ටිල්වින් සිල්වා මහතා නෙත් නිවුස් වෙත කියාසිටියා.
මේ අතර ජනතා විමුක්ති පෙරමුණේ විකල්ප කණ්ඩායමේ කැදවුම්කරු අනුරුද්ධ පොල්ගම්පල මහතා කියාසිටියේ සෝමවංශ අමරසිංහ මහතා ගත් තීරණය ජනතා විමුක්ති පෙරමුණ තුළ පැවති බෙදීම් හේතුවෙන් උද්ගත වූ තත්ත්වයක් බවයි.
ජනතා විමුක්ති පෙරමුණ බටහිර න්‍යාය පත‍්‍රයට සහ ඉන්දියාවේ රෝ ඔත්තු සේවයේ න්‍යාය පත‍්‍රයට යටවී ඇති බවද අනුරුද්ධ පොල්ගම්පල මහතා මෙහිදී කියාසිටියා.
කෙසේවෙතත් ජනතා විමුක්ති පෙරමුණේ ප‍්‍රධාන ලේකම් ටිල්වින් සිල්වා මහතා කියාසිටියේ සෝමවංශ අමරසිංහ මහතා ගත් තීරණය ඔහුගේ පෞද්ගලික තීරණයක් මිස පක්‍ෂයේ බෙදීමක් නිසා සිදුවූවක් නොවන බවයි.
