මෙන්න පුංචි බැඳපු බාප්පාගේ අක්කාගේ දුවගේ විත්තිය
අපෙ පුංචි බැඳපු බාප්පාගේ
අක්කගේ දුව
මං චූටි කාලෙ සෙල්ලම් බත් උයපු කුමරිය
ලොකු වෙන්න වෙන්න අපි
දුරස් වුණා නේද සොඳුරිය
මීට අවුරුද්දයි මාස හයක්
මූණුපොතේ පෙම් කෙරුව ළඳ
ඇගෙ තාත්තාගේ රැවිලි අතරේ
මට ඉඟි බිඟි පෑව සොඳුරිය
හරි ලස්සන පොඩි කෙල්ල හින්දා
ආදරේට කිව්ව නම මල
මට විසි හයයි ඇයට විසි තුනයි
අපෙ තරුණ කලෙ එන්න එන්න ගෙවිලා යයි
මගෙ හඳහන කුජ හතයි
යෝජනා කෝටියයි
ඒත් අම්මා මාව බන්ද වන්නේ
ගළපලමයි
මට හොරා මගෙ හිත
නුඹ ගැන විපරමයි
මට මගේ නොවන ආදරයක්
ඇති හැඩයි
නුඹ ලස්සනයි කට හරි සැරයි
නපුරුකමත් ඒ හා සමානමයි
නුඹ බොරුව අතරේ මට සිටි තරුණිය
හොඳයි
ලස්සන නොව මං බලන්නෙ
ගතිගුණයි
නුඹව බැන්දොතින් කුස්සියෙ වැඩ මටයි
මෙන්න වැන්දා ඉන්න කෙල්ල මට හොඳයි
අපෙ පුංචි බැඳපු...
මම පාන්දරට කෝල් කරන විට
වේටිං ඇයිද සොඳුරිය
ඒ දුක කියද්දි මගෙ සල්ලි අරන්
යාළුවො ටික බිව්වා සොඳුරිය
නුඹට කෝල් කරලා කෝල් කරලා
බිල දහ අට දාහයි සොඳුරිය
මගෙ කපපු ෆෝන් බිල ගෙවන්න
මේ සිංදුව හිට් වෙයිද සොඳුරිය
අම්මා කිව්වා ඉතුරු කෑල්ල
කියන්නෙපා කියලා...
මේ ගීතය ගයන්නේ සිවිල් වොයිස් නම් වූ සංගීත කණ්ඩායමක්. මේ වන විට මේ දිනවල අන්තර්ජාලයේ වැඩි දෙනෙකු නරඹා ඇති මෙය වෙනස්ම තේමාවක් ඔස්සේ රචනා වූවක්. අඬන ගීත අතරේ මෙම ගීතය ඉතා ඉක්මනින් ජනප්‍රිය වුණෙත් ඒ වෙනස නිසා වෙන්න ඇති. බාප්පාගේ අක්කගෙ දුව යනුවෙන් නම් කොට ඇති මෙය සිවිල් වොයිල්ස්ලාගේ පළමුවැනි ගීතය. එහි ප්‍රධානියා වශයෙන් කටයුතු කරන්නනේ සචින්ත පුලස්ති. ඔහු තමයි මෙම ගීතය ලියලා සංගීතවත් කළේ.
මේ වගේ ගීතයක් කරන්න ඕනෑ කියලා අයිඩියා එකක් මගේ ඔළුවෙ තිබුණේ නැහැ. දිනක් මං ගිටාර් එක අරගෙන එය වාදනය කරමින් සිටින කොට මේ තනුව මගේ ඔළුවට ආවා. වචන ටිකත් එකට සෙට් කළා. හරි අපූරු ගීතයක් නිර්මාණය වුණා.
මෙහිදී කියන්න ඕනෑ මෙම ගීතයේ අවසාන පේළි කිහිපය සකසා දුන් විකුම් ලක්ෂිත ගැන. ඔහු මේ වන විට අප අතරින් සදහටම සමු අරගෙන ඉන්නේ. මගේ ගම කළුබෝවිල. ඉගෙන ගත්තේ කොළඹ ඉසිපතන විදුහලෙන්. ඉස්කෝලේ යන කාලේ ඉඳලා බෑන්ඩ්වල හිටියා.
මේ ළඟදී දවසක තමයි සිවිල් වොයිස් නමින් අපි එළියට ආවේ. ඒකාකාරී රාමුවෙන් මිදිලා ගීතයක් කරන්නට ලොකු වුවමනාවක් තිබුණා. අපි ඒ අභියෝගය ජය ගත්තා. මෙහි වීඩියෝව කළේ චමත් අසංක.
යුරේනි නොෂිකා සමඟ මම සහ අපේ බෑන්ඩ් එකේ ලසිත ගුණවර්ධන, චතුල ඉන්ද්‍රචාප යන අය රඟපෑවා. ගාල්ල කොටුව ඇතුළෙයි ෂූට් කළේ. වීඩියෝවේ තියෙනවා මං ගිටාර් එක කරකවන දර්ශනයක්. මං ඒක හරි බයෙන් කළේ.
කලින් වතාවේ ඔය වගේ වැඩක් කරලා ගිටාර් එකේ කෑලි ටික තමයි එකතු කර ගත්තේ. ඒත් වාසනාවට මෙවර එහෙම වුණේ නැහැ. ඉදිරියේදී හොඳ නිර්මාණ ඔස්සේ සිවිල් වොයිස් සංගීත ලෝලින් හමුවන්නට හිතාගෙන ඉන්නවා.
බාප්පාගේ අක්කගේ දුව ගීතය ගැන ඒ කතා කළේ සචින්තයි.
