ශ්‍රීලනිපයේ මෙතෙක් නාමයෝජනා සඳහා අත්සන් නොතැබූ ප්‍රබලයන්, ජාතික හෙළ උරුමයේ සංශෝධිත නම වූ එක්සත් යහපාලන ජාතික පෙරමුණ, මෙන්ම වාමාංශික නැඹුරුවකින් යුතු පක්ෂ ඒකාබද්ධව "යහපාලනය සඳහාවූ එක්සත් ජාතික පෙරමුණ" යනුවෙන් "අලියා" ලකුණින් මෙවර මහමැතිවරණයට තරඟ කිරීමට යන බව වාර්තා වේ.
මෙම තීරණය හෙට දිනයේදී ප්‍රකාශයට පත්වනු ඇති බවත්,එක්සත් ජාතික පක්ෂය හෙට දිනයේ සම්මේලනයක් පවත්වා මෙම යෝජනාව සම්මත කර ගැනීමට අපේක්ෂා කරන බවත් දේශපාලන ආරංචි මාර්ග පවසයි.
රාජිත සේනාරත්න, හිරුණිකා ප්‍රේමචන්ද්‍ර, අර්ජුන රණතුංග, සුදර්ශනි ප්‍රනාන්දු පුල්ලේ, හේමාල් ගුණසේකර, නියෝමාල් පෙරේරා, එම්.කේ.ඩී.එස් ගුණවර්ධන, විජය දහනායක, අර්ල් ගුණසේකර, සරත් අමුණුගම, දුමින්ද දිසානායක ආදී ප්‍රබලයන් බොහෝ පිරිසක් මේවන තෙක් එජනිස නාමයෝජනා සඳහා අත්සන් තබා නොමැති බව සඳහන්ය.
ඉකුත් ජනාධිපතිවරණයෙන් පරාජයට පත්වූ මහින්ද රාජපක්ෂ මහතාට යළි නාමයෝජනා ලබාදිය යුතු බවට එතුමාගේ හිතෛෂිවන්ත පිරිස් දිගින් දිගටම ගෙන ගිය දේශපාලන ව්‍යාපාරයක ප්‍රතිඵලයක් ලෙස ශ්‍රීලනිපය ප්‍රමුඛ සන්ධානය දෙකඩවන ලකුණු පහළවිය.
කෙසේ වෙතත් මහින්ද රාජපක්ෂ මහතාට නාමයෝජනා ලබාදිය යුතු බවට පෙනී සිටි පාර්ශවය මේවන විට ජයග්‍රහණය කර ඇති බැවින් දූෂිත බවට චෝදනා එල්ලවුණු තවත් බොහොමයකටද නාමයෝජනා ලබාදීමට ජනාධිපතිවරයා තීරණය කර තිබීමත් සමග ඊට එරෙහිව යහපාලනයක් සඳහා පෙනී සිටි ශ්‍රීලනිප ප්‍රබලයින් විකල්ප පෙරමුණක් වෙනුවෙන් සාකච්ඡා පවත්වන්නට වූහ.
එහි අවසන් ප්‍රතිඵලය ලෙස මෙලෙස "යහපාලනය සඳහාවූ එක්සත් ජාතික පෙරමුණ" හෙට දිනයේ කලඑළි බැසීමට මේවන විට සියලු කටයුතු සූදානම්ව ඇති බව ආරංචි මාර්ග වැඩිදුරටත් කියා සිටියි.
Source - Adaderana.lk
