අපරාධ පරීක්‍ෂණ දෙපාර්තමේන්තු නිලධාරීන් විසින් ගාල්ල, රත්ගම ප‍්‍රදේශයේදී ඊයේ අත්අඩංගුවට ගත් රුපියල් කෝටි 11 කට අධික වටිනාකමින් යුත් හෙරොයින් සහ T-56 ගිනි අවි ඇතුළු අවි ආයුධ තොගය බන්ධනාගාරගතව සිටින මත්ද්‍රව්‍ය නාශක අංශයේ නිලධාරීන් විසින් විකිණීම සඳහා පාතාල නායක පොඩි ලැසීට ලබාදී තිබූ ඒවා බව විමර්ශනවලින් හෙළිව තිබේ.
මේ වනවිට බන්ධනාගාරගතව සිටින මත්ද්‍රව්‍ය නාශක අංශයේ උප පොලිස් පරීක්‍ෂක උදාර චතුරංග ඇතුළු නිලධාරීන් පිරිස පොඩි ලැසී නමැති පාතාල නායකයා කාලයක් තිස්සේ ඇසුරු කරමින් රුපියල් කෝටි ගණනක් වටිනා හෙරොයින් හා ආයුධ ජාවාරමේ නිරත වී ඇති බව හෙළිව තිබේ.
පොලිස් ආරංචි මාර්ග පවසන අන්දමට මෙම ජාවාරමට සම්බන්ධ මත්ද්‍රව්‍ය නාශක අංශයේ නිලධාරීන් පිරිස රුපියල් කෝටි 30 කට අධික වටිනාකමින් යුත් හෙරොයින් කිලෝ ග‍්‍රෑම් 30 කට අධික ප‍්‍රමාණයක් අලෙවි කිරීම සඳහා පොඩි ලැසී නමැති පාතාල නායකයා වෙත ලබාදී ඇත.
අපරාධ පරීක්‍ෂණ දෙපාර්තමේන්තුවේ නිලධාරීන් ඊයේ සොයාගනු ලැබුවේ එසේ අලෙවි කිරීම සඳහා ලබාදී තිබූ හෙරොයින්වලින් කොටසක් බව පොලිස් ආරංචි මාර්ග පවසති.
මෙම පාතාල නායකයා සතුව ඇති ඉතිරි හෙරොයින් තොගය ද අත්අඩංගුවට ගැනීමට විමර්ශන සිදුකෙරේ.
මත්ද්‍රව්‍ය ජාවාරම පිළිබඳ චෝදනා ලැබ අපරාධ පරීක්‍ෂණ දෙපාර්තමේන්තු අත්අඩංගුවේ සිටින මත්ද්‍රව්‍ය නාශක අංශයේ නිලධාරීන්ගෙන් ලද තොරතුරු අනුව මෙම හෙරොයින් හා ආයුධ රත්ගම හා තෙල්වත්ත ප‍්‍රදේශවල සඟවා තිබියදී සොයා ගැනිණි. මෙහිදී අත්අඩංගුවට ගත් අවි ආයුධ අතර ඔ-56 අවි දෙකක්, පිස්තෝල දෙකක් හා ජීව උණ්ඩ තොගයක් ඇති බව පොලිසිය කියයි.
