මෙසේ ඔහුව අත්අඩංගුවට ගෙන ඇත්තේ බන්දු සමරසිංහ මහතාගේ විකට චරිත රගපා ඒවා සීඩී ගත කර විකිණීම සම්බන්ධයෙන්, බන්දු සමරසිංහ මහතා විසින් කර තිබූ පැමිණිල්ලක් මත කොළඹ අපරාධ විමර්ශන කොට්ඨාශය පරීක්ෂණ පැවැත්වීමෙන් අනතුරුව සැකකරු අත්අඩංගුවට ගෙන ඇත, ඔහු සෙවනගල ප්‍රදේශයේ පදිංචි මේසන් බාස්කෙනෙකු යැයි පොලීසිය කියයි.
තමාගේ නමට බෙහෙවින් සමාන නමකින් හා තමාගේ රුවට බෙහෙවින් සාමාන මෙම පුද්ගලයා තමා රගපාන විකට චරිත වලට සමාන චරිත රගපාන බවත් එවැනි සංයුක්ත තැටි පවා නිකුත් කර ඇති බවත් මේ නිසා තම කීර්ති නාමයට හානියක් සිදුවී ඇති බවත් පවසමින් බන්දු සමරසිංහ මහතා පොලීසියට පැමිණිලිකර තිබිණි යැයි කොළඹ අපරාධ විමර්ශන කොට්ඨාසයේ පොලිස් නිලධාරියෙක් පැවසීය. මීට කලින් කර තිබූ දැනුම්දීමක් මත මෙම සැකකරු කොළඹ අපරාධ විමර්ශන කොට්ඨාශය හමුවේ ඊයේ පෙනී සිටි අතර ඒ සම්බන්ධයෙන් ප්‍රශ්නකර ප්‍රකාශයක් ලබාගැනීමෙන් පසුව අත්අඩංගුවට ගත් බව පොලීසිය පවසයි.
අන්‍ය පුද්ගලයකු ලෙස පෙනී සිටියේ යැයි කියමින් මොහු අත්අඩංගුවට ගත් බව එම පොලිස් නිලධාරියා කීය.
ජනප්‍රිය විකටනළු බන්දු සමරසිංහ මහතා රඟපෑ විකට ජවනිකාවල සමාන අයුරින් මෙම සැකකරු විකට ජවනිකා රගපා ඒවා සංයුක්ත තැටිලෙස නිෂ්පාදනය කර වෙළෙදපොළට නිකුත් කළ නිෂ්පාදකවරයාට එරෙහිව නීති මගින් කටයුතු කරන බව පොලීසිය කියයි. අත්අඩංගුවට ගත් සැකකරු බන්දු සමරසිංහ මහතාගේ රුවට බෙහෙවින් සමාන රූපයක් ඇති අයෙකු බවද පොලීසිය පවසයි, බස්නාහිර පළාත් භාර ජ්‍යෙෂ්ඨ පොලිස්පති අජිත් ජයසුන්දර මහතාගේ උපදෙස් මත කොළඹ අපරාධ විමර්ශන කොට්ඨාශයේ අධ්‍යෂ සහකාර පොලිස් අධිකාරී නුවන් වෙදසිංහ මහතාගේ උපදෙස් මත වැඩිදුර පරීක්ෂණ පවත්වයි.
